|
Der Artikel is im Dialekt Tirólεrisch gschriem wórn | 
|
Samnaun isch a Gemeinde in Nórdóschtn van schweizεrischn Kanton Graupintn unt grénzt direkt mitn Pundeslånt Tiról (Gemeinde Ischgl). Samnaun ligg in die Perg af 1846 Metεr ( ! ) ibεrn Méér. Hait sein zem ibεr 800 Einwóhnεr, va dé aa a påår Ausländεr va außεrhålb Mittleuropa sein.
Geschichte unt Språch[]
Man vεrmuatet, dass die Erschtpesiedlung schon vórn Jåhr 1000 n. Chr. ståttgfuntn håt. As gip an Urkunde aus 1089, dé die Exischténz zu dεr sel Zeit pelégg. Die Pesiedlεr håm nó romanisch grédt und sein ibεr die hoachn Perg va Engadin (Schweiz) her kémmen. Sie håm van Viech unt van Getroad glép, dés sie wégnen guatn Klima håm kénnt ånpaudn.
Die Vεrkehrsvεrpindung isch péssεr zu Tiról gwésn as wia zu die Schweizεr Nåchpårn. Só isch es kémmen, dass die Samnaunεr åp Ende van 17. Jåhrhundεrt ångfången håm, in Tirólεr Dialekt (Obεrinntålεrisch) zu ibεrnéhmen. Die léschtn Lait, dé nó romanisch grédt håm, sein Ånfång van 20. Jåhrhundεrt gstórm. Die Samnaunεr pezeichnen sich selbεr als kleanschte Språchmindεrheit in dεr Schweiz. In die Gremien mit die Schweizεr Nåchpårgemeintn gip’s Vεrsténdigungungsprobléme, weil die Samnaunεr nét romanisch kénnen unt die åndεrn nét taitsch rédn wélln, obwóhl sie’s kénnen. 1905 isch a schmåle Vεrpindungsstråßn zun Engadin paut gwórtn.
Religión[]
Friahεr håt Samnaun énge Vεrpindungen zun Klóschtεr Marienperg (hait Sidtiról) unt zun Klóschtεr St. Johann in Müschtair (Schweiz). Intressant isch aa, dass in dεr Gemeinde långe Zeit Katholikn unt Reformiεrte minåndεr glép håm. Die Reformiεrtn sein aufgsaugg ódεr va die Tirólεr Franzischkanεr vεrschickt gwórtn.
Spórt unt Finanzn[]
Hait isch Samnaun in an groaßn Schigepiat mit Ischgl vεrpuntn. As Dórf isch weitεrs aa staiεrlich peginschtigg, weil`s af dεr Grénz ligg. Dés ziacht aa Lait ån.